ZAPPATORE (BOVIO)
MARIO MEROLA
Felicissima sera, a tutte sti signure 'ncruvattate
e a chesta cummitiva accussí allèra, d'uommene scicche e femmene pittate!
Chesta è na festa 'e ballo, tutte cu 'e fracchesciasse sti signure
e i', ca só' sciso 'a copp''o sciaraballo, senza cercá 'o permesso, abballo i' pure!
Chi só'?... Che ve ne_'mporta! Aggio araputa 'a porta e só' trasuto ccá...
...musica, musicante! Fatevi mórdo onore,
stasera, 'mmiez'a st'uommene aligante, abballa un contadino zappatore!
No, signore avvocato sentite a me, nun ve mettite scuorno
io, pe' ve fá signore, aggio zappato e stó' zappanno ancora, notte e ghiuorno!
E só' duje anne, duje, ca nun scrive nu rigo 'a casa mia
si 'ossignuria se mette scuorno 'e nuje pur'i' mme metto scuorno 'e 'ossignuria".
Chi só'?... Dillo a 'sta gente ca i' songo nu parente ca nun 'o può cacciá...
...musica, musicante! Ca è bella ll'alleria
i' mo ve cerco scusa a tuttuquante si abballo e chiagno dint''a casa mia!
Mamma toja se ne more 'o ssaje ca mamma toja more e te chiamma?
Meglio si te 'mparave zappatore, ca 'o zappatore, nun s''a scorda 'a mamma!
Te chiamma_ancora: "Gioja" e arravugliata dint''o scialle niro
dice: "Mo torna, core 'e mamma soja, se vene a pigliá ll'ùrdemo suspiro"
Chi só'? Vuje mme guardate? Só' 'o pate i' songo 'o pate e nun mme pò cacciá!
Só' nu fatecatore e magno pane e pane, si zappo 'a terra, chesto te fa onore...
...addenocchiate... ...e vasame sti mmane!
